Ресей ЕАЭО-дан барған мигранттарға зейнетақы төлемек
Ресей Еуразия экономикалық одағына (ЕАЭО) кіретін Армения, Беларусь, Қазақстан мен Қырғызстаннан келген мигранттарға зейнетақы төлейтін болады. Зейнетақы олар тіпті өз елдеріне қайта оралса да төленбек. Мұндай шара Одақ елдерінің зейнетақымен қамтамасыз ету туралы келісімде қарастырылған. Қол қоюға дайын құжатта зейнетақы 2020 жылдан бастап төленетіні көрсетілген.
Қазіргі нормаға сәйкес зейнетақыны белгілеу және оны төлеу адамның тұрақты тұрып жатқан еліне жүктелген. Яғни, Ресейден кетіп қалған мигранттар Ресей зейнетақы қорынан зейнетақы алмайды. Жаңа келісім төлемдердің схемасын өзгертеді. Енді Ресейде жүріп жинаған зейнетақының бір бөлігі мигрант Ресейден кетіп қалса да төленетін болады. Егер Ресей азаматы жасы келіп, зейнетке шыққан соң Еуроазия одағы елдерінің біріне көшіп кетсе оған зейнетақыны Ресей төлейтін болады, дейді РБК агенттігі.
Зейнетақы төлемдері келісім күшіне енген күнінен бастап есептеліп, төленеді. Яғни алғашқы төлем Еуразия одағы елінің біріне 2020 жылдан кейін көшкендерге төленеді.
Ресей еңбек министрлігінің хабарлауынша, зейнетақы қоры 2020-2021 жылдар жаңа келісім бойынша 166 миллион рубль төлейді. Оның 91 миллионы Одақтың өзге еліне көшіп кеткен Ресей азаматтарына төленуі тиіс. Төлемдер мигранттардың еңбек өтіліне қарай өсірілетіні айтылған.
