Министрлік наразылық кезінде үш полиция зардап шеккенін хабарлады
ІІМ 9 маусымда Нұр-Сұлтандағы наразылық кезінде үш полицияның зардап шеккенін хабарлады. Бұл туралы Орталық сайлау комиссиясындағы брифинг кезінде ішкі істер министрінің орынбасары Марат Қожаев айтты.
Қожаев «наразылар полицияға тас, қолдарына түскен заттарды лақтырды. Көз ашытатын баллон қолданды» деп айыптады.
Министрлік өкілінің сөзінше, екі полицияға тас тиген, біреуінің көзі газ баллонынан күйген.
Орталық сайлау комиссиясындағы жиында Қожаев 9 маусымдағы наразылық кезінде 500-дей адам ұсталғанын, полиция наразыларды ұстау кезінде заңға сай әрекет еткенін айтты.
9 маусымда Қазақстанда президент сайлауы өтті. Осы күні полиция Нұр-Сұлтан, Алматы және Шымкентте жүздеген адамды ұстады. Елде бір-екі сағат интернет жұмысында ақау байқалды.
