Танымал діни қызметкердің үйі тоналды
Тәжікстанның оңтүстігінде Хатлон облысында танымал діни қызметкер Эшони Мухриддиннің (Хамидов) үйін тонап кеткен күдіктілер іздестіріліп жатыр.
Тонаушылар үйден 6 мың 800 доллар мен 40 мың сомони (4 мың доллардан асады) алып, ізін жасырып үлгерген.
Хатлон облысының көлік инспекторы өкілі Шомурод Шарипов аймақта тонаушыларды ұстау үшін «Аланга» («Жалын») операциясы жүріп жатқанын айтты.
Діни қызметкер тұратын Вахш ауданының әкімі Тохир Турсунов Эшони Мухриддиннің үйі тоналғанын растады. «Молда ұзақ жылдар бойы ұлымен бірге Хатлон облысындағы медреседе дәріс берді. Таңертеңнен бері үйінде тергеушілер жұмыс істеп жатыр»,- деді аудан әкімі.
Соңғы ақпаратқа қарағанда, милиция қызметкерлері «Мерседес» маркалы көліктерді тоқтатып, тексеріп жатыр.
Дереккөз: centralasian.org
