Ғизат Нұрдәулетов ҚР Бас прокуроры болып тағайындалды

ҚР Президенті Нұрсұлтан Назарбаевтың Жарлығымен Ғизат Нұрдәулетов Қазақстан Республикасының Бас Прокуроры қызметіне тағайындалды. Бұл туралы Ақорданың ресми сайты хабарлады.

«Ғизат Дәуренбекұлы Нұрдәулетов Қазақстан Республикасының Бас Прокуроры болып тағайындалсын»,- деп жазылған Жарлықта. Әрі ол Қазақстан Республикасы Бас Прокурорының бірінші орынбасары қызметінен босатылды.

Сонымен қатар, Мемлекет басшысының Жарлығымен Қазақстан Республикасының бұрынғы Бас Прокуроры Қайрат Пернешұлы Қожамжаров басқа жұмысқа ауысуына байланысты қызметінен босатылды.

Ғизат Дәуренбекұлы еңбек жолын Алматы облысы Жамбыл ауданы прокуратурасында тергеуші болып бастаған. Мемлекеттік тергеу комитетінде 1996 — 1997 жылдары қызмет атқарған. 1997 жылдан бастап ұлттық қауіпсіздік органдарында еңбек еткен. Сонымен қатар департамент бастығының орынбасары, Алматы қаласы және Алматы облысы бойынша департамент бастығы, Тергеу департаменті бастығы лауазымында болды. 2016 жылдың қараша айынан бастап Оңтүстік Қазақстан облысы бойынша ҰҚК департаментін басқарды. 2017 жылы шілде айынан бастап соңғы тағайындалуына дейін ҚР Бас прокурорының бірінші орынбасары қызметін атқарды. II дәрежелі «Айбын» орденімен марапатталған.

Abai.kz