2019 жылы қаңтарда өтетін ҰБТ-ға кімдер қатыса алады?

Келесі жылдан бастап талапкерлер қаңтар айында ҰБТ тапсыра алады. Алайда аталған тестілеуден кейін талапкерлер ЖОО-да тек ақылы негізде оқи алатыны белгілі болды

Білім және ғылым министрлігінің мәліметінше, қаңтар айында өткізілетін ҰБТ-ға қатысу үшін өтініштер 1-15 желтоқсан аралығында қабылданады. Ол ақылы болады. Құны 2242 теңгені құрайды.

Белгілі болғандай, қыста өтетін ұлттық бірыңғай тестілеуге орта мектептердің 11-12 сынып оқушылары (2019-2020 оқу жылында ЖОО-да ақылы негізде оқу үшін), ЖОО-ға уақытша тіркелген және бірінші семестрді аяқтап жатқан студенттер қатыса алады.

«11-12 сынып оқушылары үшін қаңтар айында өтетін бұл тестілеу түлектерге негізгі тестілеудің алдында өз білімдерін тексеру үшін таптырмас мүмкіндік. Мемлекеттік білім беру грантына үміттенген талапкер 2019 жылғы жазда өтетін ҰБТ-ны міндетті түрде тапсыруы қажет. Өйткені, қаңтар айындағы тестілеуде шекті балл жинаған тестіленуші бұл сертификатымен ЖОО-да тек ақылы негізде оқи алады.

Ал ЖОО-ға уақытша тіркелген және бірінші семестрді аяқтап жатқан студенттер. Бұл тестілеуден студент білім алып жүрген оқу орнына ресми тіркелу үшін және ЖОО-дағы оқуын жалғастыру үшін өтеді. Егер студент шекті балл (50 балл) жинай алмаса, оқудан шығарылатын болады», – делінеді министрлік хабарламасында.

Еске сала кетсек, қаңтар айында өтетін ҰБТ-ға қатысқан талапкерлер маусым айында өтетін ҰБТ-ға қатысу және мемлекеттік білім беру гранттарын тағайындау бойынша өтетін байқауға қатысу мүмкіндігінен айырылмайды.