«Әлемді шулатады». Қанат Ислам Қазақстан атын шығаратын боксшыларды атады
«QAZAQ» олардың Олимпиадада жеңіске жет аларына сенімді.
Алғашқы орта салмақта жұдырықтасатын қазақстандық кәсіпқой боксшы Қанат «QAZAQ» Ислам (25-0, 20 КО) Vesti.kz тілшісіне кәсіпқой рингтегі ізбасарларын атады.
WBO NABO және WBA Inter-Continental белбеулерінің иегері кәсіпқой бокстағы қазақстандық бірнеше спортшыны ерекше атап өтті.
«Жақсы боксшылар көп, жақында Садриддиннің жеңісіне куә болдық. Бастапқыда-ақ Олимпиадаға қатысатын болса, Қазақстан қоржынына жүлде салатын осы екі жігіт — Садриддин Ахмедов пен Жәнібек Әлімханұлы деп ойлаймын. Бұрын да солай ойлайтынмын, өйткені спаррингке тұрып көргенмін. Әлеуетін жақсы білемін. Бұйырса олар әлі үлкен биіктерге жетіп, әлемді шулатады деген ойдамын», — дейді белгілі боксшы.
Сонымен қатар, Қанат Ислам Top Rank Promotions компаниясымен келісімшарт жасасқан тағы екі боксшыны атады.
«Сосын тағы екі жігітіміз бар — Мадияр Әшкеев пен Мейірім Нұрсұлтанов. Мықты болмаса, кем емес», — деп атап өтті қазақстандық кәсіпқой.
Еске салайық, 20 жастағы қазақстандық Садриддин Ахмедов (7-0, 7 КО) Канаданың Монреаль қаласында өткен жекпе-жекте төртінші раундта 22 жастағы мексикалық Абрахам Хуаресті (13-5, 5 КО) нокаутқа түсіріп, орта салмақта WBC ұйымының жастар арасындағы чемпионы атанды.
