Құдайдан «ұлымды менен бұрын ал» деп тілеймін: Ауытқуы бар баланың анасы үкіметке ұсыныс айтты

Ақыл есінде ауытқуы бар баланың ата-анасына өмірбойына жәрдемақы берілуі тиіс. Әрі күтушілері инватаксимен қамтамасыз етілуі керек. 

Бүгін Парламент депутаттары Үкіметке осындай сауал жолдап, мәселеге назар салуын өтінді. Өйткені психикалық ауытқуы бар баланы ата-ана бір сәтке де назардан тыс қалдыра алмайды. Сәйкесінше жұмыс та істемейді. Ал жағдайы төмен, шалғайда тұратын отбасылар үшін бұл қиынның қиыны. Бұл бастаманы естіген күтушілердің де өз айтары бар.

– Ең негізгісі – жәрдемақыны көбейтіп, күтім өтілін есепке алса. Сосын зейнетке 55 жаста шықсақ дейміз. Біз бәрібір жұмыс істемейміз. Бір жерде қосымша жұмыста жүреміз. Сосын баспана. Меніңше, бәрін шешуге болады. Біз Ақорданың қасына барып дау шығармаймыз. Оған уақытымыз да жоқ. Балам осы жерде болғанда қосымша жұмысқа кетемін. Ауырса үйдемін, –дейді баланың анасы Гүлден Кашофора.

Фото: Мәжілістің баспасөз қызметі