TikTok бас директоры Трамптың инаугурациясына қатысуы мүмкін – New York Times

TikTok компаниясының бас директоры Шоу Цзы Чу 20 қаңтарда АҚШ-тың жаңадан сайланған президенті Дональд Трамптың ұлықтау рәсіміне қатысуды жоспарлап отыр, деп хабарлайды Agenzia Nova басылымы.

Бұл туралы New York Times газеті құпия дереккөздерге сүйене отырып хабарлаған.

Шоу Цзу Чу бұрынғы президенттер, олардың отбасылары және маңызды қонақтармен қатар инаугурация рәсіміне қатысады деп күтілуде.

Іс-шараға сонымен қатар Meta бас директоры Марк Цукерберг, Tesla және SpaceX негізін қалаушы және бас директоры Илон Маск, Amazon Group негізін қалаушы және төрағасы Джефф Безос қатысады.

Салтанатты шараға TikTok бас директорының қатысуын қытайлық ByteDance компаниясы әлі растаған жоқ.

Бұл жаңалық АҚШ-та TikTok тап болған қиындықтарға байланысты. Конгресс қабылдаған және президент Джо Байден ұлттық қауіпсіздікке байланысты қол қойған заңға сәйкес платформаға келесі жексенбіде тыйым салынуы мүмкін.

Алайда, The Washington Post сілтеме жасаған анонимді дереккөздердің хабарлауынша, Дональд Трамп платформаны «құтқарудың» бірнеше нұсқасын қарастыруда, соның ішінде заңды 2-3 айға уақытша тоқтата тұру туралы жарлыққа қол қою жоспары да бар.

Өткен айда Трамп TikTok-қа «жылы қабақ» танытатынын білдіріп, платформаның жастар арасындағы танымалдылығын атап өтті. Оның айтуынша, қарашада Камала Харристі жеңуінде TikTok маңызды рөл атқарды. Ол сондай-ақ АҚШ Жоғарғы сотын TikTok-қа тыйым салу туралы шешім қабылдамауға шақырды.

Айта кетейік, Қытай билігі TikTok-ты Илон Маскке сатуы мүмкін.