Өзбекстанда көліктің үстіне алып тас құлап, 3 адам қаза тапты (видео)

Өзбекстанның Қашқадария облысындағы асуда Cobalt көлігінің үстіне алып тас құлап, 3 адам қайтыс болды. Кей мәліметтерге сәйкес, көлікте венгриялық туристер болуы мүмкін. Бұл туралы Kznews.kz ақпарат агенттігі Podrobno.uz басылымына сілтеме жасап хабарлайды.

Китаб ауданы әкімдігінің айтуынша, қайғылы оқиға 6 қараша сағат 16:00-де Тахтақарача асуында болған. Көлік Китабтан Самарқанға бара жатқан. Қаза болған азаматтардың кім екені анықталып жатыр. Әлеуметтік желілердегі деректерге қарағанда, жолаушылар Венгриядан, ал жүргізуші Өзбекстан азаматы болған.

Қазір өткел көлік қозғалысы үшін уақытша жабылды. Қазір онда жауапты ұйымдардың арнайы мамандары жұмыс істеп жатыр. Қозғалысты қалпына келтіруге қатысты қосымша ақпарат кейінірек беріледі.

Айта кетейік, бұған дейін Қарағанды қаласында айналма тас жолда болған жол-көлік апатынан бес адам мерт болған еді.