«Қазақтарды қалай басқаруға болады»: желідегі сыннан кейін кітап сатылымнан алынып тасталды

Кітап 1734 жылғы мұрағат құжаттарынан тұрады. Оны кезінде Ресей империясының бас хатшысы, ғалым Иван Кириллов әзірлеп, патша үкіметіне тапсырған. Басылымға Кириллов жобасының мәтіні ғана емес, сонымен қатар Ресей азаматтығы қабылданғаннан кейінгі алғашқы жылдары Қазақстан қалай отарлана бастағанын көрсететін басқа да құнды тарихи құжаттар енген. Кітапты шығаруды бизнесмен Кеңес Рақышевтің қаржыландырғаны айтылады.

ЖЕЛІДЕГІ СЫН

Мета мен Тик-ток әлеуметтік желісінде қолданушылар бұл кітаптың осы атаумен әрі мұқабамен шыққанын қатаң сынға алған.  Тик-токтағы видеоға жүздеген адам пікір қалдырды. Бірі “бұл кітап керісінше пайдалы” десе, екіншісі “дұрыс сатылымнан алып тастау керек” деп талап етті.

БҰҚАРБАЙ НЕ ДЕЙДІ

Желідегі сыннан кейін Бақытжан Бұқарбай бұл кітап сатылымнан түгел алынғанын хабарлады.

– Бұған дейін ағаларымыздың әрбірімен кездесіп, кітаптың мақсат-мүддесін жеткізіп айттым. Баспагер болған соң кері байланыспен де жұмыс істеуіміз керек. Ешқашан халықтан өзімізді биік қойған жоқпыз. Оларға ұнамағаны – мұқаба болып тұр. Мұқаба көңіл көншітетіндей емес дейді. Мазмұнын түсінбей қаласың дейді. Біз сондықтан, бүкіл сату нүктелерінен бұл кітапты бүгін түгел алып тастадық. Қазір ешбір жерде бұл кітап сатылымда жоқ, – дейді Бұқарбай.

“МЕМҚҰПИЯЛАР ЧЕМОДАНЫ”

Телеграмда танымал “Чемодан госсекретов” арнасы да бұл даудан тыс қалмапты.

– Бұл басылым автор тарапынан да, демеуші тарапынан да ашық провокация секілді көрінеді. Кітапты шығаруға атсалысқан Рақышев қазір өзінің қайнатасы, Ресейді қолдайтын Тасмағамбетовке жұмыс істеп жатқаны сөзсіз. Осы арқылы олар ішкі саясатқа ықпал еткісі келеді. Біздің дереккөздер Рақышевке қатысты ұйғарым жасалғанын хабарлайды, – деп жазады ол.

Айтпақшы, бұл кітапты осыдан бір ай бұрын Арман Шораев мақтаған болатын. Оның кітаптың уақтылы шыққанын жазғаны бар.