«Уақытты кері қайтару» петициясы бойынша қоғамдық тыңдау өтті

«Уақытты кері қайтару» петициясын қарау бойынша құрылған жұмыс тобының екінші рет қоғамдық тыңдаулары өтті.

ҚР Сауда және интеграция министрлігінде сарапшылар петиция авторы тарапынан бірінші отырыста көтерілген сұрақтарға жауап берді.

Бұл энергия тұтыну мен шығындардың өсуі, уақыт ауыстырудың денсаулыққа әсері, ЖКО санының көбеюі және басқа да мәселелер, деп хабарлайды Azattyq Rýhy ведомствоның баспасөз қызметіне сілтеме жасап.

Талқылауға Парламент депутаттары, петицияның бастамашысы, қоғамдық бірлестіктер мен сараптамалық қауымдастық өкілдері, денсаулық сақтау, энергетика, ауыл шаруашылығы, көлік, төтенше жағдайлар, еңбек және әлеуметтік қорғау, сауда және интеграция министрліктері мен басқа да мемлекеттік органдар қатысты. Отырысқа Мәжіліс депутаты Еркін Әбіл төрағалық етті.

«Ғылыми бағалау үшін біз жоғары дәлелді әдіс болып табылатын метаанализ жүргіздік. Оның мақсаты – халықтың денсаулығына оңтайлы уақыт белдеуінің қалай әсер ететінін зерттеу.

Біздің зерттеудің ашықтығы мен қайталанушылығын қамтамасыз ету үшін PRISMA ұсынымдарын қолдандық. PubMed, Web of Science, Scopus, Google Scholar және Ресейлік ғылыми дәйексөз индексі мәліметтері базасынан 128 456 мақаланы зерттедік, олардың ішінен 3 427 ең өзектісін таңдадық.

Зерттеулер оңтайлы уақытты пайдаланудың теріс салдарын анықтамады – керісінше, оның халықтың денсаулығы мен әл-ауқатына оң әсерін растайды. Біздің метаанализіміз дұрыс уақытты қолдану денсаулыққа зиян тигізбейтінін растайды, бұл осы уақыт стандартын таңдауды негіздейді.

Жаңа уақытқа бейімделу үшін уақыт пен жеке көзқарас қажет, бірақ уақыт астрономиялық және географиялық заңдарға сәйкес келгенде тезірек жүреді», — деді С.Ж. Асфендияров атындағы ҚазҰМУ ғылыми-техникалық паркінің жетекшісі Ильдар Фахрадиев.

UTC+5-ке ауысқаннан кейінгі медициналық мекемелерге жүгінулер мен аурулар статистикасы:

Бірыңғай уақыт белдеуін енгізген күннен бастап көп уақыт өткен жоқ, алысқа баратын қорытынды жасауға әлі ерте. Биылғы маусым айындағы мәліметтер бойынша алғашқы медициналық-санитарлық көмек көрсету ұйымдарына жүгінген адамдар саны 0,1%-ға азайды.

Ағымдағы жылдың 6 айда қан ауруларының 13,7%-ға, психикалық және мінез-құлықтық бұзылыстардың 11,3%-ға төмендеуі байқалды, онкология бұрынғы деңгейде қалды.

Аймақтық тұрғыда ШҚО-да қан айналымы жүйесінің ауруларының 15,9%-ға, онкологияның 1,5%-ға және психикалық бұзылулардың 12,2%-ға төмендеуі байқалды.

Алматы қаласы бойынша қан айналымы жүйесі ауруларының, онкологияның 2,3%-ға, психикалық бұзылулардың 15,8%-ға төмендеуі байқалады.

«Қазақстанның елді мекендерінің жергілікті уақыты жергілікті жерде күннің ең биік нүктесіне жетуі тиіс, ол күндізгі сағат 12:00-де болуы керек. UTC+5 меридианы 75 градус шығыс бойлықта орналасқан, бұл меридиан бойынша талтүс сағат 12.00-де болуы тиіс.

Уақыт белдеуінің ені бұл уақытқа +/- жарты сағатты құрайды», — деді «Фесенков атындағы Астрофизикалық институт» ғылыми-зерттеу жұмысы бойынша директорының орынбасары Рашид Валиулин.

Сонымен қатар, 2023 және 2024 жылдардың ұқсас кезеңдерін салыстыру дұрыс емес, өйткені электр энергетикасында жыл сайын шамамен 3% тұтыну өсімі байқалады.

Бұл халық санының, заңды тұлғалардың көбеюіне байланысты. Мысалы, 2021 жылы 2022 жылмен салыстырғанда өсім 6%-ды құрады.

Жүктемелерге келетін болсақ, олар бір сағатқа ауысты: кешкі уақытта ұлғаю таңертеңгі тұтынудың азаюымен өтеледі.

Фото интернеттен алынды.