Бишімбаев Салтанат Нүкенованың әкесінің психикалық ауруға шалдыққанын айтты

Қуандық Бишімбаев сот отырысы кезінде Салтанат Нүкенованың әкесінің психикалық ауруға шалдыққанын айтты. Бұл туралы Kznews.kz Stan.kz ақпарат агенттігіне сілтеме жасап хабарлайды.

Қуандық Бишімбаев сот алдында жауап беру кезінде Салтанат Нүкенова отбасында орын алған мәселелер туралы өзіне айтып бергенін, әкесінің психикалық ауытқуы бар екенін мәлімдеді. Сотталушы Нүкенованың мінез-құлқында да тұрақсыз психикалық жағдайдың белгілері болғанын айтты.

Сот Бишімбаевқа тергеу материалында мұндай ақпарат болмағаны туралы ескерту жасаған. Алайда сотталушы өз нұсқасын алға тартты.

“Мен бұл туралы тергеу барысында айттым және тергеушіге тиісті талап қоюды өтіндім. Себебі Салтанаттың өзі маған психикалық тұрақсыздығының осыған байланысты (әкесінің ауытқуына) екенін айтқан», – деп қарсылық білдірді Бишімбаев.

Қуандық Бишімбаев Салтанаттың әкесіне қатысты берген айғақтары сотқа дейінгі тергеу материалдарында бар деп сендірді.

Бұған жауап ретінде зардап шеккен тараптың адвокаттары сотқа Салтанат Нүкенованың әкесінің психикалық жағдайы туралы анықтама берді. Құжатқа сәйкес, Бишімбаевтың сөзі расталмаған. Ер адам психиатрда есепте тұрмаған. Қорғаушы куәлікті іс материалдарына тіркеп, алқабилерге көрсетуді сұрады.