Денсаулық сақтау министрі қымбат брендтің киімдері мен сөмкесін қаншаға алғанын айтты
![](https://kznews.kz/wp-content/uploads/2024/02/full_17090405520f998c3797fc9e3654b2ddb2251a1fe9_webp-905x613.webp)
Денсаулық сақтау министрі Ақмарал Әлназарова өзінің әлеуметтік желіде жариялаған суреттеріндегі Dolce & Gabbana брендінің көйлегі мен қымбат сөмкелеріне қанша ақша жұмсағаны туралы сұраққа жауап берді. Бұл туралы Kznews.kz ақпарат агенттігі хабарлайды.
Журналистер министрден ондай қымбат брендтерден киіну үшін қанша жалақы алу керек екенін сұрады.
«Брендтердің жанкүйерімін деп айта алмаймын. Менің үлкен гардеробым жоқ. Фотодағы сөмке қарапайым қыздардың да қалтасы көтеретін сөмке, бағасы 250 мың теңге. Ал көйлекті өзімнің мерейтойыма еңбек демалысым үшін алған ақшаға сатып алғанмын. Құны есімде жоқ, 800-900 мың теңгенің арасында», – деді Әлназарова.
Министр өзінің жаңа қызметтегі жалақысы туралы сұраққа да жауап берді.
«Мен әлі жалақы алған жоқпын, бірақ көп болады деп ойламаймын», – деді министр.
Еске салсақ, бұған дейін денсаулық сақтау министрі ауылда медициналық нысандар салуға 100 миллиард теңге сұрағаны туралы жазған едік.