Қашқын шенеунік Храпунов Байбекті Алматыдағы көшкін трагедиясы үшін айыптады

Алматының бұрынғы әкімі мәжіліс депутаты Бақытжан Базарбектің бұрын айтқан нұсқасын қайталады.

Оның айтуынша, 1995 жылы Медеу ауданындағы жалпы ауданы 0,17 га жер учаскесі белгілі бір азаматқа гаражға қызмет көрсету үшін берілген.

– Мен ол кезде Энергетика министрлігінде қызметте едім. 11 жылдан кейін 2006 жылы Алматы қаласының әкімі Иманғали Тасмағамбетов болды. Олар жер учаскесінің нысаналы мақсатын бау-бақшаға ауыстырады. Мұның бәрі заң шегінде болуы мүмкін, — дейді Храпунов.

2014 жылы бұл учаске сатып алу-сату негізінде басқа азаматтың атына аударылған. Ол тиісті өтініш беріп, блок үй салу үшін осы учаскені пайдаланудың мақсатын өзгертуді сұрайды.

– 2015 жылы Алматы әкімдігінің жер комиссиясының қорытындысы негізінде қала басшысының орынбасары Болат Сауранбаевтың қолымен Алматы әкімі Байбек тиісті қаулыға қол қояды және осы жер учаскесінің нысаналы мақсатын өзгертеді, – деп жалғастырады Храпунов.

Жер-кадастрлық істе Алматы қаласының сәулет және қала құрылысы басқармасының қорытындысы болған. Ол бұл жер учаскесі ішінара осы шағын ауданның көшелерінің қызыл сызықтарында, толығымен инженерлік-көлік аймағында және тектоникалық ақауда екенін көрсеткен.

– Алматы болсын, кез келген қала, елдімекен көшелеріндегі қызыл сызықтар деген не? Ешкім ол жаққа кіруге тыйым салынғандықтан, ол қызыл сызық деп аталады. Осының негізінде әкімнің бұл қаулыға қол қоюға және нысаналы мақсатын өзгертуге құқығы болмаған, — деп қорытындылады Храпунов.

Лай көшкіні

Адам өліміне байланысты төтенше жағдайды тергеуді міндетіне алған арнайы комиссия тергеп-тексеріп, қылмыстық істің қозғалғаны белгілі. Құтқарушылар 3 мың текше метр балшық сырғып кеткенін айтқан. ТЖД қайғылы жағдайдың алдын-ала себебі – топырақтың батпақтанып, сырғып кеткенінде дейді. Биікте тұрған үйлердің тұрғындары салған су құбыры, нөсер кәрізі немесе септиктер топырақты езіп жіберген деген де пікір айтылады. Апат салдарынан төрт адам көз жұмған.