Бутаковкадағы жерлерді заңсыз берген Сағынтаевтан неге жауап алынбаған?
Бұған дейін бас прокурор Берік Асылов Алматы әкімі Бақытжан Сағынтаевтың жерін заңсыз иеліктен шығару туралы мәліметтерді тексеруді тапсырған болатын.
Брифингте журналистер бас прокурордың орынбасары Жандос Өміралиевтен «Бутаковкадағы жерді беру ісі бойынша бұрынғы әкімнен жауап алынды ма?» деп сұрады.
«Бұл жерде қылмыстық іс жоқ. Сондықтан жауап алу мүмкін емес. Алматы қаласының прокуратурасы осы учаскенің берілу заңдылығына талдау жүргізеді. Егер мен қателеспесем, Бутаковка бойынша прокуратура қала әкімінің осы учаскенің нысаналы мақсатын рекреациялық аймақтан тұрғын үйге өзгерту туралы шешімінің күшін жою жөнінде шаралар қабылдады. Қазір прокурордың наразылығы бойынша жер учаскесі бұрынғы мәртебесіне ауыстырылды. Жер ресурстарын басқару комитеті әрі қарай шаралар қабылдауда», — деді Өміралиев.
Фото: inbusiness.kz
