Елдік сананың жаңғыруы | «Айқын» газеті

Елбасымыз, ұлт Көшбасшысы Нұрсұлтан Назарбаевтың «Ұлы даланың жеті қыры» атты мақаласы – елдік сананы қалыптастырудағы және жаңғыртудағы мазмұны терең саяси бағдарламалық мақала. Тәуелсіздіктің алғашқы күнінен бастап, Елбасымыздың қазақтың бай, тарихи-мәдени мұрасын өркениеттік әлемге танытып, орнын айқындаудағы еңбегі ерен десек қателеспейміз.

Баршамызға мәлім, осыдан 15 жыл бұрын, яғни 2003 жылы сәуірде Прези­дент Қазақстан халқына Жолдауында алғаш рет «Мәдени мұра» мемлекеттік бағдарламасын жүзеге асыру туралы тапсырма берген болатын. «Мәдени мұра» бағдарламасының арқасында ұлтымыздың әдебиет, философия, та­рих, этнография, тіл, бір сөзбен айт­қанда, гуманитарлық білімді дамыту­дағы субстанциялық негіздері қа­лан­ды. Қытай, Түркия, Моңғолия, Ресей, Батыс Еуропа мен АҚШ елде­ріне ғылыми-зерттеу экспедициялары ұйымдастырылып, нәтижесінде 350-ден астам ғылыми кітап, жаңа энци­кло­педиялық сөздіктер шығарылды. Бұл бағдарлама елдік сананы қалып­тас­тырудағы алғашқы тың жоба болды.
Одан дейін «Қазақ хандығының 550 жылдығы» қарсаңында Президент Ұлытаудағы сұхбатында Қазақ хандығының құрылуы туралы және Қазақ мемлекеті кейбір саясаткерлер айтқандай, «жоқ жерден пайда болған емес», керісінше, Қазақ мемлекет­тілігінің тарихы тереңде жатқандығын және Қазақ хандығының елдік сананы қалыптастырудағы рөлінің ерекше еке­ніне тоқталды.
2017 жылдың сәуірінде Елбасы «Болашаққа бағдар: рухани жаңғыру» мақаласын жариялады. Мақала қазақ қоғамында тың серпіліс берді. Мақа­лада Елбасы ұлы даланың төсіндегі мәңгілік елді қалыптастырудағы мем­лекет құрушы қазақ халқының орны ерекше екендігіне тоқталып өтті.
Елдік сананы жаңғыртып, қалып­тастырудағы жетістіктерімізді, соның ішінде ұлы даланың ұлы есімдерін халықаралық аренада ұтымды пайда­лану керектігіне назар аударды. Біз мысалы, Египет дегенде Перғауын­дарды, Батыс Еуропа дегенде Ньютон мен Галилейді елестетеміз. «Ұлы Дала» дегенде ата-бабаларымыздың есім­дерін мақтанышпен айтатындай ел билеген тұлғалардың галереясын жасауды тапсырды.
Ұлт Көшбасшысы Нұрсұлтан Назарбаевтың «Ұлы даланың жеті қыры» мақаласы ұлтымыздың елдік санасын ояту мен қалыптастырудағы, сондай-ақ болашақ ұрпақты ұлы даланың заңды мұрагері рухында тәрбиелеудегі орны ерекше. Сөз аяғын Елбасының «Төл тарихын білетін, бағалайтын және мақтан ететін ұлттың болашағы зор… Өткенін мақтан тұтып, бүгінгі нақтыны бағалай білу және болашаққа оң көзқарас таныту – еліміздің табысты болуының кепілі» деген сөзімен аяқтағанды жөн көрдік.

Зулфухар Ғайыпов,
Астана қаласы мәслихатының депутаты, Астана қаласындағы «Нұр Отан» партиясының «Көлік» бастауыш ұйымының төрағасы