ҚАРИЯЛАРҒА КӨРСЕТІЛГЕН ҚҰРМЕТ | «Айқын» газеті

Партиялықтар игі іс аясында қарияларға, көпбалалы, аз қамтылған отбасыларға, мүмкіндігі шектеулі жандарға көмек көрсетуде. «Жас Отан» ЖҚ Ақтөбе облыстық филиалы зейнеткер Ұмсынай Ибрашеваның үй жұмысына жәрдемдесті.

Жастардың бірі жиһаздардың шаңын сүртсе, екіншісі еденін жуып берді. Бұл 82 жастағы жалғызбасты әжеге үлкен көмек болды. Ол жасотандықтарға өмір жолын әңгімелеп, ақыл-кеңесін айтты.
– Орал қаласының тумасымын. Үш ағайынды едік. Інім қайтыс болды. Әпкемнің соңынан еріп, Ақтөбеге келдім. Біраз жыл тігінші болып жұмыс істедім. Жолдасым екеуміз бір ұл тәр­биелеп өсірдік. Алайда балам жаза­тайым суға кетіп қайтыс болды. Соның күйігінен жолдасымның миына қан құйы­лып, көз жұмды. Қазір жалғыз қал­дым. Қарттық әркімнің де басына түседі, осылай қарияларға қамқор болыңдар, – деді ол.
Жасотандықтар әжейге жиі келіп тұрады. Ал партияның қалалық филиалы оны тұрақты қамқорлығына алған.
Ұмсынай Ибрашева жазда пәтерін жөндеуге «Нұр Отан» партиясының қалалық филиалынан көмек сұрапты. Ең бірінші болып Ақтөбе қалалық мәслихаттағы партия фракциясының мүшелері қол ұшын созған. Олар азық-түлік әкеліп берсе, «Трансэнерго» АҚ барлық коммуналдық қарыздарын жапты. Содан кейін депутаттар қаржы жинап, пәтерін жөндеп берді.
– Пәтерім 20 жыл бойы жөндеу көр­меген болатын. Бірде «Нұр Отан» партиясының қалалық филиалынан кө­мек сұрадым. Бір айдың ішінде пәтерім адам танымастай өзгеріп шықты. Пар­тиялықтарға ризашылығым шексіз, –дейді әжей.
Ақтөбелік партиялықтар ұйымдас­тырған акция бүгін Шалқар ауданында да жалғасын тапты. Партияның Шалқар аудандық филиалы бұл жолы көпбалалы Алдановтар отбасына көмек ұйым­дастырған.
Әйгерім мен Мақсат қайтыс болған туыстарының 5 баласын қамқорлығына алған екен. Өздерінің 3 баласымен бірге 8 бала тәрбиелеп отыр. Балалардың алды – студент, ал кішісі балабақшаға барып жүр.
Отағасы Мақсаттың тұрақты жұ­мысы жоқ. Әйгерім аудандық жұмыспен қамту орталығында жұмыс істейді екен. Ол – белсенді партия мүшесі. Әлеуметтік сала қызметкерлері күні қарсаңында партия бастамаларын жүзеге асыруға үлес қосқаны үшін алғысхатпен мара­патталған.
– Біз аудандағы мүмкіндігі шектеулі жандарға, аз қамтылған және көпбала­лы отбасыларға «Мейірімді жүрекпен» акциясы аясында көмек ұйымдастырып келеміз. Оның ішінде Алдановтар от­басы да бар.
Бұл отбасы 2014 жылы партияның қолдауымен үйлі болды. Студент балалары «Жасыл ел» бағдарламасы бойынша уақытша жұмысқа орна­лас­тырылды, – деді партияның аудандық филиалы төрағасының бірінші орын­басары Жарылқасын Шамбалаев.

Алтынай САҒЫНДЫҚ, Ақтөбе облысы,