«17 жасымнан танымалмын»: Ақтөбеде екі бірдей концерт берген Қайрат Нұртас әлі де хит болатынын айтты (фото)

Қайрат Нұртас 9 наурыз күні Ақтөбе қаласында бірден екі концерт берді. Тамағы ауырып тұрса да, көрермен ықыласы артық екенін айтқан әнші аналарға құттықтауын арнады, деп жазады KAZ.NUR.KZ тілшісі.

«Аналарымыз қартаймасын, дендері сау болсын. Оларға екі дүниенің бақытын нәсіп етсін. Халықаралық ханымдар мерекесі құтты болсын»,- деді Қайрат. Кешкі концертке жиналған халық, әдеттегідей, оған құшақ-құшақ гүлмен келді. Жас қыздар әншімен суретке түсіп қалу сәтін іздеп, орындарына отырмастан, сахна алдында тұрып тұрды. Қайрат өз кезегінде көрермендеріне жылы лебізін жеткізді. «17 жасымнан бастап танымал болған екенмін. 33 жас. Әлі келе жатырмын. Әлі бермеймін. Қалжың. Әр қазақ менің жалғызым. Сіздердің көңілдеріңнен шығуға жұмыс істеймін. Бір-бірімізге шынайы махаббат, шынайы достықпен қарайық. Аман-сау жүргенім өздеріңіздің жүрекжарды тілектеріңіздің арқасы. Қай жерде болсын елімнің ықыласының арқасында Қайрат болып жүрмін. Менің барым — сіздер,»- деді ол.

Кеш арасында шөлдеп, көмекшілерінен су сұраған ол анасы туралы, оның айтқызбай сезетінін айтты. «Осы кезде анам болса су әкеліп беретін еді. «Балам шөлдеп қалды-ау» деп әкелер еді. Сахнаның артында мың бала жүр. Бәрі не істеп жүргенін білмейді,»- дейді ол. Әнші концерт кезінде тыңдармандарымен сыр бөлісіп, соңғы кездері ән жазуға көңіл бөліп жүргенін жасырмады.

«12 ән жазыппын. Ән деген шабытпен келеді екен. Қатты ғашық болғанда, үйге көп бармай қойғанда… Соңғы кезде ән жазып жүрмін. «Қатты қатты сағындым» деген әннің қалай шыққанын білесіздер ме? Отырмын сағынып. Анау келеді. Бірақ жоқ. Ойша. «Келді» дедім. Кім келді? «Келді, аккорд берші» дедім. Мен келдім, сен келдің, адамы мен елдің, айға қарайлап, күтесің жұма, айлап, деп отырғанда көңілсіз болып кетті, әрі қарай ұрысып кетемін»,- деген әнші әзілдерімен көрерменінің көңілін көтеруді ұмытпады.