Семейлік ару әйелдер арасында өткен «Әлем аруы-2018» байқауын жеңіп алды

СЕМЕЙ. ҚазАқпарат — Семейлік Лейла Құлжанова Мәскеуде «World Beauty 2018» сұлулық, сән және дарын байқауының фестивалін жеңіп алды, деп хабарлайды «ҚазАқпарат» ХАА.

Фестивальға барлық жас дәрежелері бойынша әлемнің 20-дан астам мемлекетінен үміткерлер қатысты. Финалға шығудан бұрын үміткерлердің әрқайсысы өз елдерінде ұйымдастырылған іріктеу кезеңдерінен өткен. Іріктеу кезеңдері Ресей, Мальта, Македония, Қазақстан, Вьетнам, Франция, АҚШ, Түркия сияқты өзге де бірқатар мемлекеттерде ұйымдастырылған.

Бұл туралы өзінің әлеуметтік желідегі парақшасында байқауға Қазақстан атынан қатысқан үміткер жария етті. Семейлік Лейла Құлжанова әйелдер арасында ұйымдастырылған «Әлем аруы — 2018»  байқауына қатысып, «Gold»  дәрежесіндегі (36-40 жас) «Grand-Prix-Mrs. World 2018» атағын жеңіп алған.

Лейла — түрлі сән байқауларының жеңімпазы ғана емес, ол сонымен қатар мықты кәсіпкер де. Ол банк құрылымын басқарады. Қайрымдылық шараларына көп қатысады, Қазақстанның іскер әйелдер қауымдастығының мүшесі.

Байқауға қатысушылардың барлығы демеушілерден сыйлықтар алды. Сонымен қатар оларға Пьер Карденнің жетекшілігімен өтетін «Universe Beauty 2019» сүлулық, сән және дарын байқауына қатысу үшін 50 000 доллардың сертификаттары берілді.