Баспана алудың жаңа мүмкіндігі | «Айқын» газеті

«Нұр Отан» партиясының Орталық аппаратында «Президенттің бес әлеуметтік бастамасының» іске асырылуын бақылау бойынша өңірлік Қоғамдық кеңес төрағаларының, аймақтық партия филиалдары төрағалары бірінші орынбасарларының қатысуымен Елбасы Нұрсұлтан Назарбаевтың «Әрбір отбасына баспана алудың жаңа мүмкіндіктерін беру» бірінші бастамасын іске асыруды бақылау жөніндегі жұмыс тобының отырысы өтті.

Басқосуға «Президенттің бес әлеуметтік бастамасының» іске асырылуын бақылау жөніндегі Қоғамдық кеңестің төрағасы, Сенат депутаты Бақытжан Жұмағұлов, «Нұр Отан» партиясының хатшысы, жұмыс тобының жетекшісі Қаны­бек Жұмашев, «Баспана» ипоте­ка­лық компаниясы Басқарма төраға­сы Қайрат Алтынбеков, Банк омбудс­мені Ерсерік Сиырбаев, Инвестиция­лар және даму министрлігі Құрылыс істері және тұрғын үй-коммуналдық шаруашы­лы­ғы комитеті төрағасының орынбасары Бақытжан Качаков қатысты.
Жиында «Әрбір отбасына баспана алудың жаңа мүмкіндіктерін беру» баста­ма­сын тиімді іске асыруға бағытталған «7–20–25» бағдарламасын жүзеге асыру және аталған бірінші бастаманы өңірлерде тиімді іске асыру туралы күн тәртібіндегі өзекті мәселелер қаралды.
Кездесуді жүргізген «Нұр Отан» партия­сының хатшысы, жұмыс тобының жетекшісі Қаныбек Жұмашев басқосудың маңызына тоқталды.
– Бүгінгі кездесуіміздің басты мақсаты «7–20–25» бағдарламасының өңірлерде тиімді жүзеге асуының және туындаған мәселелерді шешу жолдарын талқылау тиісті ұсыныстарды қабылдау. Өздеріңізге белгілі, бірінші бастама бойынша жұмыс тобы­ның бірінші отырысы ағымдағы жыл­дың 19 маусымында өткізілген бола­тын. Отырыс қорытындысы бойын­ша бірін­ші бастаманың жүзеге асырылуына қатысты туын­­даған мәселелерді шешу жолында ұсыныстар мүдделі мемлекеттік органдарға жолданып, тиісті шаралар жүзеге асырылды. Осы аралықта жұмыс тобы­ның мүшелері өңірлерге іссапар кезінде тұр­ғын­дармен кездесулер ұйым­дас­тырып, бағдар­ла­ма­ның жүзеге асуына үлестерін қосты, – деді Қ.Бекболатұлы.
Жұмыс тобының отырысы барысында бейнебайланыс арқылы Қызылорда облысы әкімінің орынбасары Серік Сүлейменов, Жамбыл облысы әкімінің орынбасары Еркебұлан Дауылбаев, Алматы облысындағы «Президенттің бес әлеуметтік бастамасын» іске асыру мони­то­рингі бойынша өңірлік Қоғамдық кеңес төрағасы Садық Әбдіқадыров, Атырау облысындағы «Президенттің бес әлеумет­тік бастамасын» іске асыру мони­торингі бойынша өңірлік қоғамдық кеңес­ төрағасы Бақберген Қарабаев Президент­тің Бірінші әлеуметтік баста­масын іске асыру бойынша атқарыл­ған жұмыстар туралы баяндады.

Абылайхан ЖҰМАШ