Алматыда жас полицей жедел жәрдем көлігінде көз жұмды

Әкімшілік полиция инспекторы түнгі кезекшіліктен кейін өз көлігімен үйіне бара жатқан, оқиғаның мән-жайы тергеу барысында анықталады

НҰР-СҰЛТАН, 18 сәуір – Sputnik. Алматыда әкімшілік полицияның 28 жастағы қызметкері жол апатынан ажал құшты. Апаттың себептері тергеу барысында анықталады, деп хабарлайды Sputnik Қазақстан.

Қайғылы оқиға 18 сәуір таңертең Әл-Фараби даңғылы мен Жароков көшесінің қиылысында болған.

Куәгерлердің айтуынша, Toyota Camry-35 автокөлігі Әл-Фараби даңғылымен батыс бағытқа қарай кетіп бара жатқан. Жароков көшесімен қиылысар тұсқа жақындаған кезде, жүргізуші рөлге ие бола алмай, бордюрге қарай ұшып кетіп, кейін жерасты өткелінің қоршауына соғылған.  

«Жол апаты салдарынан полицей ауыр жарақат алды. Дәрігерлер өміріне араша түсе алмады, өкінішке қарай, ол жедел жәрдем көлігінде көз жұмды. Жүргізушінің қанынан алкоголь табылған жоқ. Апаттың мән-жайы тергеу барысында анықталады», -деді Алматы полиция департаментінің баспасөз қызметінен.

Осы фактіге қатысты сотқа дейінгі тергеу басталды, қажетті сараптамалар белгіленді.

Алматы полиция департаментінің басшылығы мен жеке құрамы марқұмның жақындарына көңіл айтады.