туысы мүгедек қызды екі жыл бойы зорлап келген

Бойжеткен церебралды сал ауруына шалдыққан. Оған қоса, мылқау және құлағы естімейді. Ер адам өз кінәсін мойындамай отыр

НҰР-СҰЛТАН, 14 қаңтар – Sputnik. Ақтөбе қаласында ер адам бала кезінен II топтағы мүгедек қызды екі жыл бойы зорлап келген. Бұл туралы «Не Молчи» қоғамдық қорының жетекшісі Дина Таңсәрі жазды, деп хабарлайды Sputnik Қазақстан тілшісі.

«Ақтөбеде тағы жаға ұстатарлық қылмыс болды! Жәбір көрген қыздың туыстары біздің көмегімізге жүгінді. 1966 жылы туған туысқан ағасы осы үйдің мүгедек қызына қарап, емдеу массажын жасап тұрған. Ондай болады деп кім ойлаған?», — деп жазды Таңсәрі ұйымның Facebook-тегі парақшасында.

Оның сөзіне қарағанда, бойжеткен церебралды сал ауруына шалдыққан. Оған қоса, мылқау, құлағы да естімейді. Тіркеуде «деменция» диагнозымен тұр.

«Бір күні анасы туысқан ер адамның келгенін қызы ұнатпайтынын байқаған. Содан ақырын мәселенің мән-жайын сұрастыра бастады. Бас кезінде мүгедек қызы үндемеді, артынан анасына туысқан ағасының өзін бірнеше рет зорлағанын түсіндірген. Туған-туыстары тергеу кезінде мүгедек қыздан сурдоаудармашы арқылы жауаптың қалай алынғанын, сараптамада оның қиналып, бәрін  қалай түсіндіргенін айтқанда жағамызды ұстадық», — дейді ұйым жетекішісі.

Жәбірленуші анасына зорлықтың қай бөлмеде жасалғанын, тіпті орнына дейін көрсеткен. Ал туысқан ағасы өз кінәсін мойындамай, қыз өзі азғырып, қылмысқа итермеледі деп отыр. Сосын жыныстық қатынастың бір-ақ рет болғанын мәлімдеді.

Тағы оқыңыз: «Бір жыл бойы зорлаған»: Белгілі адвокат Тоқаевқа Сарыағаштағы сұмдықты айтты

Сараптама кезінде зорлық-зомбылықтың болғаны расталды. Ер адам қылмыстық кодекстің 120-бабы, 2-бөлімі, 4-тармақ (зорлау) бойынша жауапқа тартылады. Оған сәйкес, кінәлі адам бес жылдан он жылға дейінгі мерзімге бас бостандығынан айырылады.