Омбы облысы үшін Қазақстанмен ынтымақтастық не үшін маңызды?

Осы жылдың басынан бастап Қазақстан мен Омбы облысы арасындағы тауар айналымы өсіп жатыр, деді губернатор Александр Бурков

OMБЫ, 6 қараша – Sputnik. Қазақстан Омбы облысының басты экономикалық серіктесі болып есептеледі, деді өңір губернаторы Александр Бурков. Облыс үшін көрші елдердің кәсіпорындарымен ынтымақтастық орнату маңызды.

«Қазақстан Омбы облысының басты серіктесі. Сыртқы сауда айналымының төрттен бір бөлігі Қазақстанға қатысты. Өткен жылы ол 140 миллиард доллар болды. Биылғы сегіз айдың ішінде Омбы облысы мен Қазақстан арасындағы тауар айналымының 22% өскенін байқап отырмыз. Экспорт 23%, импорт 19% артқан», — деді Бурков «Жоғары технологиялар: Ресей мен Қазақстан өңірлерінің мүмкіндіктері» көрмесін аша отырып.   

Оның айтуынша, бұл көрсеткіштер Омбы облысы мен Қазақстанның өзара сауда-экономикалық қатынастары дамып келе жатқандығын көрсетеді.

Омбы облысының аумағында қазақстандық тараптың қатысуымен 192 кәсіпорын жұмыс істейді, деп атап өтті Александр Бурков.

Қазақстанның сауда және интеграция вице-министрі Қайрат Төребаев ынтымақтастықты дамытудың бірнеше бағытын атады.

«Біріншісі – ауыл шаруашылығы. Қазақстан – аграрлы ел, ал Омбы – Ресейдегі маңызды ойыншы. Сіздер мен бізде бар технологиялар бір-бірін толықтырады. Біз ынтымақтастықты жалғастырамыз. Тағы бір маңызды сала – мұнай химиясы. Ынтымақтастықтың үшінші бағыты – қаржы», — деп түсіндірді ол.

Төребаев Омбы бизнесін «Астана» халықаралық қаржы орталығының мүмкіндіктерін пайдалануға шақырды.

Ол білімді тағы бір келешегі зор сала деп атады. Омбы облысында жақсы ғылыми-техникалық база бар, ал Қазақстанда жоғары білікті кадрларға сұраныс жоғары деді ол.

«Жақсы мамандар пулына ие болу үшін бізге Омбы жоғары оқу орындарымен тығыз ынтымақтастық керек», — деп толықтырды Төребаев.

6 қарашада Омбыда Қазақстан мен Ресейдің өңіраралық ынтымақтастық форумы басталды. Қатысушылар үшін жоғары технологиялар көрмесі ашылды.

7 қарашада президент Қасым-Жомарт Тоқаев пен Ресей президенті Владимир Путиннің қатысуымен жалпы отырыс өтеді деп жоспарланған.