68 жастағы зейнеткер тамаққа қақалды

Оқиға орнына павлодарлық дәрігерлер 6 минутта жеткен. Осы уақытқа дейін жедел жәрдем қызметінің диспетчері зардап шеккен тұрғынның жақындарына
телефон арқылы кеңес берген

НҰР-СҰЛТАН, 14 қазан – Sputnik. 68 жастағы ер адам таңғы ас кезінде тамаққа қақалып, демала алмай қалды, деп хабарлады Павлодар облыстық жедел жәрдем станциясы Sputnik Қазақстан-ға.

Облыстық жедел жәрдем станциясы баспасөз қызметінің хабарлауынша, 68 жастағы павлодарлық таңғы ас кезінде тамаққа қақалған. Ол демала алмай, беті көгеріп кеткен кезде туыстары шұғыл түрде жедел жәрдем қызметіне телефон соққан.

Оқиға орнына дәрігерлер бригадасы жіберіліпті. Осы уақытта 103 диспетчер қызметінің маманы телефон арқылы зардап шеккен адамға қалай көмектесу керек екенін айтқан. Туыстары қатты қобалжыса да, алғашқы медициналық көмек көрсетіп үлгеріпті. Диспетчердің көмегімен туыстары ер адамның өмірін сақтап қалды. Кейін ол демала бастады.

Тағы оқыңыз: Ақмола облысында ер адам тамаққа қақалып өлді

Мамандар оқиға орнына 6 минутта жетті. Дәрігерлер павлодарлықтың денсаулығын тексерді. Ол ауруханаға барудан бас тартыпты.

Жақындары диспетчер мен дәрігерлерге шексіз алғысын білдірді.

Айта кетейік, жедел жәрдем қызметі диспетчері қолданған әдіс — «қоңырауды ұстап тұру» деп аталады. Демек, диспетчер оқиға орнына жедел жәрдем бригадасы жеткенше, науқастың жақындарына алғашқы медициналық көмекті қалай көрсету керек екенін айтады. Мұндай әдіс осы уақытқа дейін бірнеше адамның өмірін құтқарған. Павлодарлық медицина қызметкерлерінің бұл тәжірибесін басқа өңірлерде де қолдану жоспарланып отыр.