Дағдарыс кезінде өзіңді қалай ұстау керектігі жөнінде 5 кеңес

1. Дағдарыс кезінде дұрыс ойлай білетіндердің акциялары ерекше өседі. Дұрыс ойлау арқылы дүрбелеңге ермеңіз, сенімділігіңізді жоғалтпаңыз. Дұрыс ойлай білудің көзі – табиғат, кітаптар, мақалдар, ертегілер, ұлттық дәстүрлер, үлкендердің ақылы және басқалар.

2. Әлсіздікке қарсылардың акциялары бірден өседі. Әлсіздікке қарсылығыңызды күшейтіңіз. Бұл түсінікті Нассим Николас Талеб «Әлсіздікке қарсылық» кітабында қолданады. Әлсіздікке қарсылықтың көзі – өзіңіз.

3. Шығындарын азайтып, кірісін көбейтетін, өзінің өнімділігін арттыратын адамдардың құны артады. Оның көзі –қаржылық тәртіп.

4. Пайыздық қарыз алғандардың акциялары қатты түседі. Егер бұған дейін алсаңыз, қайтаруға мүмкіндік болса, беріп тастаған дұрыс. Егер қайтара алмасаңыз – несие берушіге жағдайыңызды шынайы айтыңыз және қарыздың бір бөлігін азайтып немесе қайта құрылымдауды cұраңыз. Пайыздық қарыз деген бақытсыздыққа жетелейтін ең қысқа жол. Бұрынғы банкир ретінде айтып отырмын. Проблеманың көзі – ертеңгң күннің есебінен бүгін жақсы өмір сүруге деген ынтаңыз.

5. Әмбебап адамдар мен жоғары деңгейлі кәсібилердің құны өседі. Бірақ, өз ісін жақсы білетіндердің өзі қосымша жаңа сала мен мамандықты игергені дұрыс. Көзі – білім мен ықылас, ниет.

Қысқасы, кеңес өте көп, оқыңыздар.

Бұл кеңестерді күнделікті өмірмен қатар, биржада да қолдануға болады.

Ең соңында мына ашулы суретті ұсынамын.